Susurdu sünbüllər hər axşamçağı – Günün şeiri

10 Fevral 2022 10:11 408

Pencək

Könül Arif

Bir qadın vardı -

Havalıydı.

Axşamlar oğrun-oğrun

Zəmidəki müqəvvaya

Yemək aparırdı.

Demə,

Müqəvvanın çiyninə

İtkin oğlunun pencəyi salınmışdı...

Qadını görcək zəmidəki qarğalar

Qoynuna sıxıb yavrularını

Elə heeey

Üzüyuxarı baxırdı.

Ağlayırdı qarğalar qadına,

Qarğa dilində

Ağlayırdı...

Susurdu sünbüllər hər axşamçağı,

Qucurdu zəmi torpağı

Sinəsinə düşüb unudulan

Əzik-çürük buğdaları...

Ötürürdü küləklər bir-birinə,

Öpürdü küləklər cümlə-cümlə

Ana laylasını:

"Bu tikəni də ye, balam,

Ye ki, rahaaat yatasan.

Ağlayır, bax, qarğalar -

Hamısı da acdı ha,

Ye! Qalmasın onlara..."

Xəbər